Port Royal des Champs

Arrest sur les lettres patentes pour l'établissement du Port-Royal à Paris

DU Lundy XVI. Febvrier. Ce jour la cour après avoir delibere sur les lettres patentes d'érection en cette ville ou fauxbourg d'un monastere pour les religieuses, abbesse & couvent de N.D. du Port-Royal, lad. Cour a arresté que delibérant sur les lettres des hospitalieres, les trois chambres assemblées, sera aussy delibéré & pourveu à ce qu'à l'advenir il ne soit érigé ny estably en cette ville & fauxbourg aucuns monasteres, attendu du grand nombre qui y est de présent.

Enregistrement desdites lettres

Dudict jour. Veuës par la cour les lettres patentes du roy données à Paris au mois de Decembre 1625. par lesquelles ledict seigneur permet à la roynes sa mere, du consentement du sieur archevesque de Paris, d'ériger & faire ériger, fonder à rente, bastir & édiffier un monastere, avec l'eglise, bastimens & offices necessaires en cette ville de Paris ou aux fauxbourgs d'icelle, & y faire transporter les religieuses abbesse & convent de N.D. du Port-royal ; voulant icelle abbaye estre entretenue & estimée de fondation royalle, & qu'elle jouisse des droicts & provileges y attribuez, &c. Veuës aussy les lettres de declaration de ladicte dame royne mere du mois de Decembre dernier. Le consentement du sieur archevesque de Paris du 24. Aoust precedent. Le contract d'acquisition faicte par Dame Catherine Marion veufve /70/ de feu M. Anthoine Arnault vivant sieur d'Andilly & advocat de ladicte cour, de la maison appellée de Clagny, ses appartenances & dependances, datté du 19. Juillet 1624. La declaration faicte par ladicte damoiselle au proffit desdictes religieuses, abbesse & convent du Port-royal du 8. Febvrier dernier. Conclusions du procureur general du roy, & tout consideré : LADICTE COUR a ordonné & ordonne que lesdictes lettres seront registrées ès registres d'icelle, pour jouïr par les impetrantes de l'effect & contenu en icelles, aux charges, clauses & conditions portées par les consentemens baillez par les sieurs archevesque de Paris & general de l'ordre.

Sources : D. Michel Félibien, Histoire de la ville de Paris, Paris, G. Desprez, 1705, tome V, p. 69-70.